Dagvistun ungra barna í Finnlandi

Í Finnlandi nefnist dagvistun ungra barna því formlega heiti „varhaiskasvatus“ á finnsku og „småbarnspedagogik“ á sænsku, sem gæti á íslensku útlagst sem „uppeldis- og menntastefna í árbernsku“. Dagvistunarmál heyra undir finnska menntakerfiðog ásamt  for- og grunnskólanámi myndar dagvistun ungra barna samhangandi heild sem stuðlar að þróun og námi og leggur grunn að símenntun alla ævi. Öll börn undir grunnskólaaldri eiga rétt á dagvistun í Finnlandi, líka þó að annað foreldri eða bæði séu utan vinnumarkaðar. 

Form dagvistunar í Finnlandi eru þrjú: leikskólar, dagforeldrar og opin dagvistunarúrræði. Forsjáraðilar geta valið það dagvistunarform sem hentar barni þeirra best. Nánari upplýsingar eru á vefsvæði Fræðsluráðs í Finnlandi (Opetushallitus).

Hafir þú áhuga á forskólanámi finnurðu nánari upplýsingar á síðunni Forskólanám í Finnlandi.

Sveitarfélögin bjóða börnum á aldrinum 0 til 6 ára dagvistun í leikskólum, hjá dagforeldrum eða í opinni dagvistun. Sækja þarf um dagvistunarúrræði hjá sveitarfélagi fjórum mánuðum áður en dagvistun á að hefjast. Hægt er að fá pláss á tveimur vikum ef foreldrar fá vinnu eða komast inn í nám í Finnlandi. Nánari upplýsingar um dagvistun eru á þjónustuvefnum Suomi.fi.

Gjald fyrir dagvistun á vegum sveitarfélaga ræðst af tekjum fjölskyldunnar, fjölskyldustærð og því hvað barnið sækir dagvistun í margar klukkustundir á viku. Nánari upplýsingar um gjaldtöku vegna dagvistunar eru á vefsvæði finnska mennta- og menningarmálaráðuneytisins.

Dagvistun á vegum einkaaðila fyrir börn á aldrinum 0–6 ára getur verið á einkareknum leikskólum, hjá dagforeldrum eða í opnu dagvistunarúrræði. Þá er sótt um pláss beint hjá viðkomandi leikskóla, dagforeldri eða úrræði.

Þú getur einnig ráðið einhvern til að sinna barninu á heimili þínu. Ráðir þú manneskju til að annast barn eða börn á heimili þínu verður þú  vinnuveitandi hennar og hefur skyldum að gegna í samræmi við það. 

Verð fyrir dagvistun á vegum einkaaðila eru breytileg. Þú getur fengið styrk frá Kela vegna dagvistunar á vegum einkaaðila og þá er slík dagvistun ekki endilega mikið dýrari en dagvistun á vegum sveitarfélags. Þú getur fengið styrk vegna dagvistunar hjá einkaaðila ef þú ræður manneskju til að sinna barninu á heimili þínu eða ef barnið er í einkareknu dagvistunarúrræði, og að því gefnu að barnið sé eldra en níu mánaða en undir grunnskólaaldri.

Nánari upplýsingar um dagvistun á vegum einkaaðila færðu hjá því finnska sveitarfélagi sem þú býrð í eða ert að flytja til. Nánari upplýsingar um styrk vegna dagvistunar á vegum einkaaðila eru á vefsvæði finnsku almannatryggingastofnunarinnar (Kela).

Þú átt rétt á styrk til að sinna barni heima ef barn þitt sem er eldra en sex ára en yngra en þriggja ára hefur ekki fengið úthlutað dagvistunarplássi hjá sveitarfélagi. Þú þarft ekki sjálf(t)(ur) að vera heima með barnið. Leyfilegt er að ráða einhvern annan til þess, svo sem ömmu, afa eða fagaðila. Nánari upplýsingar um styrk til að sinna barni heima eru á vefsvæði Kela.