Norðurlöndin fá stýrihóp um samhæfingu norrænnar byggingarstarfsemi
![Byggarbetsplats](/sites/default/files/styles/content_size_800/public/2020-06/byggarbetsplats-1.jpg?itok=buSGyBt_)
Stýrihópurinn, sem heyrir undir Norrænu ráðherranefndina, er skipaður fulltrúum allra norrænu landanna. Verkefni hópsins er að efla og samræma starf til lengri tíma að því að koma á fót sameiginlegum norrænum byggingamarkaði, til dæmis með samhæfingu byggingareglugerða norrænu ríkjanna.
Stýrihópnum er einnig ætlað að hafa frumkvæði að og efla aðgerðir sem styrkja forsendur fyrir samþættum og sjálfbærum vexti á sviði byggingarmála.
Mikil áhersla verður lögð á sjálfbærni og hringrásarhagkerfi. Meira en þriðjungur af losun norrænu landanna á koltvísýringi kemur frá húsnæði og byggingarstarfsemi. Norrænir ráðherrar húsnæðis- og byggingarmála vilja bæta úr þessu, meðal annars með því að auka samstarf milli landanna.
Styður við framtíðarsýn fyrir norrænt samstarf
Á fundi sínum 10. október 2019 samþykktu ráðherrarnir yfirlýsingu þar sem þeir skuldbinda sig til að leitast við að vera í fararbroddi á heimsvísu svo Norðurlönd geti orðið það svæði sem mest sækir fram í því að þróa lausnir sem draga úr losun í byggingarstarfsemi. Tilgangurinn er einnig að auka samkeppni til þess að íbúðarhúsnæði verði ódýrara.
Bæði yfirlýsingin og nýi stýrihópurinn eru í anda framtíðarsýnar Norrænu ráðherranefndarinnar um að Norðurlöndin verði sjálfbærasta og samþættasta svæði heims 2030.
Stýrihópurinn mun hittast að minnsta kosti einu sinni á ári og á að gefa skýrslu um vinnu sína bæði til norrænu atvinnumálaráðherranna og ráðherra húsnæðis- og byggingarmála.