Cecilia Damström

Cecilia Damström (f. 1988) hefur skapað sér nafn sem fjölhæft og snjallt tónskáld sem hefur ýmsa tjáningarmáta tónlistarinnar á valdi sínu, allt frá kammer- og söngtónlist til barnaópera og verka fyrir sinfóníuhljómsveitir. 

Rauður þráður í tónsmíðum Damström er nálgun hennar á heiminn í kringum okkur og á hið sára og óþægilega í samtímanum. Hún hefur samið langa röð verka um loftslagsvandann (Requiem for our Earth, ICE, Fretus, Wasteland, Permafrost) sem náði hápunkti í verkinu Extinctions, sem var samið fyrir sinfóníuhljómsveit finnska ríkisútvarpsins og frumflutt í janúar 2024.

Efni verksins er uppruni lífsins, þróun tegundanna og útrýming þeirra á stórum skala. Bygging verksins fylgir þróuninni undanfarin 600 milljón ár eftir tímalínu þar sem ein mínúta tónlistar samsvarar 30 milljónum ára í sögu alheimsins. Nútími okkar, mannöldin, varir í 0,02 sekúndur.

Innan hins víðfeðma og fjölbreytilega höfundarverks Damström má telja Extinctions til nútímalegri verka tónskáldsins. Hún nýtir möguleika sinfóníuhljómsveitarinnar af mikilli leikni og skapar á 20 mínútum fágaða og heillandi heild með skírskotun til lengri tíma.

Sú aðferð tónskáldsins að nálgast loftslagsvandann á grundvelli vísindanna sprettur af djúpri, siðferðislegri sannfæringu og það hvernig hún rýnir í umhverfi okkar og samfélag er óaðskiljanlegt frá heimsmynd hennar og ímynd sem tónskálds. Damström hefur verið nefnd Greta Thunberg tónlistarinnar, og ekki að ástæðulausu.