Forseti Norðurlandaráðs fordæmir árásirnar í Kaupmannahöfn
![Höskuldur Þórhallsson](/sites/default/files/styles/content_size_800/public/images/H%25C3%25B6skuldur%2520%25C3%259E%25C3%25B3rhallsson294228.jpeg?itok=nLusP6sU)
Ljósmyndari
Audunn Nielsson/norden.org
Höskuldur Þórhallsson, forseti Norðurlandaráðs, fordæmir hryðjuverkaárásirnar sem áttu sér stað í Kaupmannahöfn um helgina og lýsir stuðningi ráðsins við dönsku þjóðina og alla þá sem árásin snerti persónulega.
„Ég fordæmi árásirnar, sem voru bein aðför að tjáningar- og skoðanafrelsinu en það eru grundvallargildi í norrænu velferðarsamfélögunum og Norðurlandaráði,“ segir Höskuldur.
„Því verðum við að halda áfram baráttunni gegn ofstæki og fordómum í samfélögum okkar og standa í sameiningu vörð um það gagnsæi og tjáningarfrelsi sem einkennir lífið og tilveruna á Norðurlöndum.“
Norðurlandaráð er vettvangur þingmanna í opinberu norrænu samstarfi. Mannréttindi, lýðræði, jafnrétti og meginreglur réttarríkis hafa verið grundvallargildi Norðurlandaráðs frá stofnun þess árið 1952.