Íþrótta- og Ólympíusamband Íslands hlýtur Norrænu lýðheilsuverðlaunin
Verðlaunin eru veitt einstaklingi, samtökum eða stofnun sem lagt hefur mikið af mörkum til bættrar lýðheilsu á Norðurlöndum. Að þessu sinni afhendir Kristján Þór Júlíusson verðlaunin í tengslum við fund heilbrigðis- og félagsmálaráðherra Norðurlanda í Kaupmannahöfn 16. október næstkomandi.
Hvatning til að halda áfram
– Við höfum um árabil hvatt fólk til að taka þátt í þeirri fjölbreyttu líkamlegu hreyfingu sem boðið er upp á. Það er okkur heiður að hljóta Norrænu lýðheilsuverðlaunin. Verðlaunin eru mikil viðurkenning og fela í sér hvatningu til að halda áfram starfi okkar að lýðheilsumálum segir Líney R. Halldórsdóttir, framkvæmdastjóri Íþrótta- og Ólympíusambands Íslands.
Rökstuðningur
Í rökstuðningi fyrir verðlaunaveitingunni segir: „Íþrótta- og Ólympíusamband Íslands (ÍSÍ) hefur í meira en tvo áratugi haft mikil áhrif á lýðheilsu á Íslandi með því að leggja áherslu á að almenningur lifi heilbrigðu lífi. ÍSÍ hefur haft frumkvæði að áætlunum um hreyfingu, lífsstíl og vellíðan almennings. Áætlanirnar hafa haft mikil áhrif á fólk á öllum aldri og skilað góðum árangri hjá áhættuhópum. Íþrótta- og Ólympíusamband Íslands er verðugur handhafi Norrænu lýðheilsuverðlaunanna 2014 fyrir skilvirkt og kerfisbundið starf að lýðheilsumálum.“
Norrænu lýðheilsuverðlaunin
Með Norrænu lýðheilsuverðlaununum vekja Norræna ráðherranefndin og Norræni lýðheilsuháskólinn athygli á mikilvægu starfi í þágu heilbrigðis og vellíðunar. Þar er átt við félagslega, líkamlega og andlega þætti í umhverfinu, þætti sem hafa áhrif á lífsstíl, en jafnframt skipulag og starfshætti heilbrigðis- og sjúkraþjónustu. Verðlaunin eru veitt einstaklingi, samtökum eða stofnun sem lagt hefur mikið af mörkum til bættrar lýðheilsu á Norðurlöndum.