Norðurlandaráð: Bann við örplasti í snyrtivörum
![Hanna Kosonen](/sites/default/files/styles/content_size_800/public/images/Hanna%2520Kosonen%2520127047.jpeg?itok=aSed0TMA)
Hanna Kosonen (C) frá Finnlandi, formaður sjálfbærninefndar Norðurlandaráðs, leggur áherslu á að í tillögunni felist ekki krafa um að draga umtalsvert úr magni örplasts í sjó og vötnum, en henni fylgi skýr skilaboð þrátt fyrir það.
„Bann sem þetta sendir skýr skilaboð til atvinnulífs og stefnumótandi aðila annars staðar í heiminum. Það beinir kastljósinu að neikvæðum áhrifum örplasts og kann að flýta fyrir pólitískum aðgerðum og ákvörðunum, bæði mönnum og umhverfi til góða,“ segir Kosonen.
40 tonn í sjónum
Samkvæmt skýrslunni „Sources of microplastic pollution to the marine environment“ enda 40 tonn af örplasti, sem bætt hefur verið í snyrtivörur, í hafinu árlega í Noregi einum saman. Sambærilegar tölur hafa birst í Danmörku. Bæði neytenda- og umhverfisverndarsamtök og aðilar úr plastiðnaðinum, sem Norðurlandaráð leitaði álits hjá í ferlinu, líta bann við örplasti í snyrtivörum jákvæðum augum.
Undanfarið hefur plastmálið verið fyrirferðarmikið í umræðum flokkahópanna í Norðurlandaráði. Það var flokkahópur jafnaðarmanna sem átti frumkvæði að tillögunni, en örplastið hefur einnig verið á dagskrá hjá flokkahópi miðjumanna.
Bíldekk stærsta vandamálið
Hanna Kosonen segir engan vafa á því að sjálfbærninefnd Norðurlandaráðs muni áfram beita sér fyrir því að draga úr plastúrgangi og ofnotkun plasts.
„Margir vita ekki að bíldekk eru helsti orsakavaldur örplasts í höfunum okkar. Kannski mætti beina athyglinni að þeim með samnorrænum aðgerðum. Sem stendur vinnum við úr tillögu flokkahóps miðjumanna um að draga úr plastúrgangi á Norðurlöndum, meðal annars plastpokum og plastefnum sem ekki eru niðurbrjótanleg,“ segir Kosonen.
- Tillagan um norrænt bann við örplasti í snyrtivörum verður rædd á þingfundi á vorþingi Norðurlandaráðs í Stokkhólmi dagana 3.-4. apríl.