Norrænar eyjar leggi áherslu á frumkvöðlamenntun
![Unga entreprenorer](/sites/default/files/styles/content_size_800/public/images/Unga%2520entreprenorer754990.jpeg?itok=szcJQsxX)
„Nordic Entrepreneurship Islands“ var ýtt úr vör í nóvember 2015. Verkefnið var til eins árs og var markmið þess að rannsaka og kortleggja kennslu í frumkvöðlastarfi í skólum og námi eftir stúdentspróf á sjö völdum eyjum á Norðurlöndum.
Markmiðið til lengri tíma litið felst í líflegum eyjasamfélögum með blómlegu atvinnulífi – jafnvel þar sem þróunin virðist vera á annan veg.
Hvatningarstyrkur
Fyrsta skrefið getur falist í því að fjárfesta í frumkvöðlamenntun í skólunum. Næsta skref getur svo verið að veita hvatningarstyrk til hugvitssamra ungmenna, sem ákveða þá ef til vill að láta reyna á hugmyndir sínar í heimabænum í stað þess að flytja.
Þær eyjar sem tekið hafa þátt í verkefninu eru Borgundarhólmur í Danmörku, Andøya í Noregi, Gotland í Svíþjóð og Parainen í Finnlandi auk Álandseyja, Færeyja, Grænlands og Íslands.
Á síðastliðnu ári hafa sjö verkefni ungmenna hlotið styrki innan ramma verkefnisins, eitt frá hverri eyju. Til dæmis hlaut íslenska verkefnið, Rentmate – sem á að hjálpa námsfólki að finna sér heimili í Reykjavík – styrk að upphæð 25 þúsund da.kr. til frekari hugmyndaþróunar.
Stigabanki fyrir sjálfboðaliða
Á Andøya hefur hópur framhaldsskólanema hlotið styrk til verkefnisins „Get’em points“, sem gengur út á að búa til stigabanka fyrir sjálfboðaliða sem taka þátt í menningarhátíðum.
Ein af niðurstöðum norræna eyjaverkefnisins er á þá leið að greinilegt samband er á milli almennrar stefnu um frumkvöðlamenntun og þess fjölda nemenda sem fær kennslu í frumkvöðlastarfi á eyjunum.
Umfang frumkvöðlamenntunar á eyjunum birtist einnig í þeim fjölda styrkumsókna sem barst, að sögn Christians Vintergaard, framkvæmdastjóra danska nýsköpunarsjóðsins, sem sá um samhæfingu verkefnisins á eyjunum.
„Það munar greinilega um það að hafa stefnu. Stefna í þessum málum var ekki til staðar á öllum eyjunum sem skoðaðar voru, þó að þær kynnu að tilheyra landi sem hafði eigin stefnu. Á Borgundarhólmi er frumkvöðlamenntun hluti af námskrá margra skóla, þar sem Danmörk hefur almenna stefnu á þessu sviði. Ísland er einnig gott dæmi, þar eru margir ungir frumkvöðlar, en þó er engin stefna enn sem komið er,“ segir Christian Vintergaard.
Þekking fyrir vinnumarkaðinn
Á eynni Andøya starfa sex ungmenni frá framhaldsskólanum í Andøy að því að hrinda hugmyndinni að „Get’em points“ í framkvæmd. Grundvallarhugmyndin felst í því að ungmenni með minni fjárráð eigi þess einnig kost að taka þátt í menningarhátíðum og öðrum menningarviðburðum.
„Við hlökkum mikið til þess að reka okkar eigið fyrirtæki einhvern daginn. Til að byrja með könnum við áhugann hér á litlu eynni okkar, Andøya, en vonumst til þess að þjónustan geti orðið aðgengileg um allan Noreg,“ segir Sandra Ström, fjármálastjóri verkefnisins.
Sandra stundar nám á þriðja ári við framhaldsskólann í Andøy, þar sem frumkvöðlanám er valkvætt fag á öðru og þriðja ári.
„Þetta er mikilvægt fag, það er áhugavert og ögrandi og maður öðlast dýrmæta þekkingu sem getur nýst á vinnumarkaði seinna meir,“ segir Sandra Ström.
Þann 16. nóvember fer lokaráðstefna verkefnisins fram í Kaupmannahöfn, og mun lokaskýrslan innihalda efnahagsgreiningu varðandi frumkvöðlamenntun á hverri eyju fyrir sig.
„Við metum það umfang fjárfestinga sem við teljum nauðsynlegt að setja í frumkvöðlamenntun og styrki, svo að eyjarnar fái fullnýtt þá möguleika sem búa í unga fólkinu,“ segir Christian Vintergaard.