Stóra norræna loftslagsáskorunin hafin!

Nemendurnir keppa með því að læra að lifa á sjálfbærari hátt. Bekkirnir mæla meðal annars varma-, vatns- og orkunotkun sína á keppnistímabilinu og þeim sem tekst að minnka notkun sína mest hlotnast auðvitað stig fyrir þann árangur.

Auk þess að vera keppni er loftslagsáskorunin metnaðarfullt og viðamikið upplýsingaverkefni. Á vef Loftslagsáskorunarinnar er mikið námsefni sem hægt er að nota í náttúruvísinda- og samfélagsgreinum.

Keppnin er haldin innan ramma verkefnisins Norðurlönd í skólanum og er hluti af starfi Norrænu ráðherranefndarinnar á sviði græns vaxtar. Markmiðið er að fá eins marga skóla og bekki á Norðurlöndum og hægt er til að taka þátt og þannig breiða út áhuga og þekkingu á sviði orku- og umhverfismála.

Keppnin stendur fram til 12. mars 2015, sem er dagur Norðurlanda. Veitt verða verðlaun, hvort tveggja í einstökum löndum og á Norðurlöndum sem heild, meðan á keppninni stendur.