Skráning á þing Norðurlandaráðs hafin
Eitt af helstu viðfangsefnum þingsins að þessu sinni eru hrattræn markmið Sameinuðu þjóðanna um sjálfbæra þróun og hvernig Norðurlöndin geti í sameiningu unnið að því að ná þeim. Markmið Sameinuðu þjóðanna verða meðal annars rædd á leiðtogafundi þingmannanna í Norðurlandaráði og forsætisráðherra Norðurlanda sem haldinn verður 1. nóvember.
Í tengslum við þingið verður jafnframt haldinn þemadagur um sjálfbærnimarkmiðin í miðstöð Sameinuðu þjóðanna (FN Byen) í Kaupmannahöfn 31. október. Fjölmiðlar hafa aðgang að viðburðinum.
Ýmis pólitísk málefni sem eru ofarlega á baugi verða til umræðu á Norðurlandaráðsþingi, meðal annars aðlögun flóttamanna og vinnumarkaðsmál, en þau verða rædd á grundvelli úttektar Poul Nielsons, fyrrum ráðherra í dönsku ríkisstjórninni, á atvinnulífi framtíðarinnar á Norðurlöndum. Alþjóðamál sem eru á döfinni og viðfangsefni tengd varnar- og öryggismálum verða til umræðu 2. nóvember þegar utanríkis- og varnarmálaráðherrarnir gefa þingmönnum Norðurlandaráðs skýrslu.
Í tengslum við þingið funda forsætisráðherrar Norðurlanda jafnframt með ráðherrum Eystrasaltsríkjanna og forsætisnefnd Norðurlandaráðs. Ennfremur munu samstarfsráðherrar Norðurlanda funda með forsætisnefndinni. Ýmsir fagráðherrar funda jafnframt meðan á þinginu stendur.
Verðlaunaafhending Norðurlandaráðs
Tilkynnt verður um handhafa verðlauna Norðurlandaráðs þriðjudagskvöldið 1. nóvember. Verðlaunaafhendingin fer fram í tónleikahúsi danska ríkisútvarpsins (Danmarks Radios Koncerthus) Eftir verðlaunaafhendinguna verður haldinn blaðamannafundur og tækifæri verður til myndatöku.
Blaðamenn sem ætla að fylgjast með Norðurlandaráðsþingi og verðlaunaafhendingunni auk viðburðarins í miðstöð Sameinuðu þjóðanna í Kaupmannahöfn þurfa að skrá sig í síðasta lagi 28. október. Framvísa þarf gildu blaðamannaskírteini. Skráning gildir einnig fyrir blaðamannafundi ráðherra sem haldnir verða í tengslum við þingið.
Norðurlandaráð hefur bókað nokkurn fjölda hótelherbergja fyrirfram fyrir blaðamenn. Þeir sem vilja nýta sér þennan möguleika geta haft samband við Birgitte Haj deildarritara. Netfang hennar birhaj@norden.org og símanúmer +45 60 39 42 07. Norðurlandaráð greiðir ekki fyrir hótelherbergin.
Norðurlandaráð er þing opinbers samstarfs Norðurlanda. Á árlegu haustþingi fer fram pólitísk umræða milli Norðurlandaráðs og fulltrúa ríkisstjórnanna í Norrænu ráðherranefndinni. Hægt er að fylgjast með þinginu á Twitter undir kassamerkjunum #nrsession og #nrpol